ភ្នំពេញ៖ ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស លោក សុខ ចិន្តាសោភា បានរៀបចំការប្រកួតកីឡាវាយកូនគោលក្នុង «យុទ្ធសាស្ត្រការទូតសេដ្ឋកិច្ច» របស់ក្រសួងដែលការប្រកួតនេះមានឈ្មោះថា "ការប្រកួតកីឡាវាយកូនគោលមិត្តភាពការទូត-ធុរកិច្ច"។
ការប្រកួតនេះធ្វើឡើងក្លឹបវាយកូនហ្គោហ្កាឌិនស៊ីធី រាជធានីភ្នំពេញ ថ្ងៃទី៣ ខែតុលា ឆ្នាំ២០២៣នេះ ដោយមានការចូលរួមពីមន្ត្រីជាន់ខ្ពស់ក្រសួងការបរទេស និងក្រសួងពាក់ព័ន្ធ ឯកអគ្គរាជ និងរដ្ឋទូត អង្គការអន្តរជាតិមួយចំនួននៅកម្ពុជា ព្រមទាំងអ្នកវិនិយោគិនដែលកំពុងមានប្រតិបត្តិការនៅកម្ពុជា។
រដ្ឋមន្ត្រីការបរទេសលោក សុខ ចិន្តាសោភា មានប្រសាសន៍ថា៖ «ការប្រកួតកីឡាវាយកូនគោលមិត្តភាពការទូត-ធុរកិច្ចនាថ្ងៃនេះ គឺជាព្រឹត្តិការណ៍លើកដំបូងរបស់ក្រសួង ដើម្បីគាំទ្រនូវយុទ្ធសាស្ត្រការទូតសេដ្ឋកិច្ច។ ការប្រកួតនេះមិនមែនជាវេទិកាសម្រាប់ការប្រកួតប្រជែងគ្នានោះទេ ក៏ប៉ុន្ដែនេះគឺវេទិការដើម្បីបង្កើតនូវមិត្តភាព និងកិច្ចសហប្រតិបត្តិការរវាងស្ថាប័នរដ្ឋ អ្នកការទូត ជាមួយនឹងវិស័យឯកជននៅកម្ពុជា»។
គួរឱ្យដឹងដែរថាកម្ពុជាបានដាក់ចេញ «យុទ្ធសាស្ត្រការទូតសេដ្ឋកិច្ច» ដែលក្រសួងបានដាក់ចេញកាលពីឆ្នាំ២០២១ ហើយដែលយុទ្ធសាស្ត្រនេះនឹងរួមចំណែកធ្វើឱ្យសម្រេចបាននូវចក្ខុវិស័យរបស់ប្រទេសកម្ពុជាជាប្រទេសមានចំណូលមធ្យមកំរិតខ្ពស់នៅឆ្នាំ២០៣០ និងប្រទេសមានចំណូលខ្ពស់នៅឆ្នាំ២០៥០៕
